شنگھائی (ویب ڈیسک) دنیا بھر میں کرونا وائرس انفکیشن سے اموات کی تعداد 11 لاکھ سے تجاوز کر گئی، کرونا کی اس دوسری لہر میں گزشتہ چوبیس گھنٹوں کے دوران 6 ہزار 100 افراد ہلاک جب کہ 4 لاکھ افراد میں وائرس کی تصدیق کی گئی۔
شنگھائی کی نجی سافٹ ویئر سلوشن کمپنی کی ریفرنس ویب سائٹ ورلڈومیٹر کے اعداد و شمار کے مطابق دنیا بھر میں نئے کرونا وائرس کو وِڈ نائنٹین سے ہلاکتیں 11 لاکھ 9 ہزار 250 ہو گئی ہیں۔
یہ مہلک وائرس اب تک دنیا کے 215 ممالک اور علاقوں میں 3 کروڑ اور 95 لاکھ 93 ہزار انسانوں کو متاثر کر چکا ہے، دوسری طرف وائرس سے لگنے والی بیماری سے اب تک 2 کروڑ 96 لاکھ 58 ہزار مریض صحت یاب ہو چکے ہیں۔
چین سے نمودار ہونے والے اس وائرس نے سب سے زیادہ تباہی امریکا میں پھیلائی، اب تک وائرس سے امریکا میں 2 لاکھ 23 ہزار افراد جانوں سے ہاتھ دھو چکے ہیں جب کہ متاثرہ افراد کی تعداد 82 لاکھ 88 ہزار ہے، جن میں 53 لاکھ 95 ہزار مریض صحت یاب ہو چکے ہیں۔
بھارت میں کرونا بدستور بے قابو ہے، ایک دن میں مزید 62 ہزار کیسز رپورٹ ہوئے، مجموعی متاثرین کی تعداد 74 لاکھ 32 ہزار سے تجاوز کر گئی ہے، جب کہ اموات 1 لاکھ 13 ہزار ہو چکی ہیں۔
برازیل میں کرونا وائرس سے ہلاکتیں بڑھ کر 1 لاکھ 53 ہزار ہو گئی ہیں اور متاثرہ افراد کی مجموعی تعداد 52 لاکھ 1 ہزار سے تجاوز کر چکی ہے۔ روس میں وائرس سے اموات 23 ہزار 700 سے زائد ہیں جب کہ متاثرہ افراد کی تعداد 13 لاکھ 69 ہزار ہو چکی ہے۔