چنیوٹ (ویب ڈیسک) ڈپٹی کمشنر محمد ریاض کی ہدایت پر دریائے چناب پر دوسری پری فلڈ موک ایکسرسائز کا انعقاد،ڈپٹی کمشنر چنیوٹ نے موک ایکسرسائز کا معائنہ کیا، موک ایکسرسائز میں ریسکیو 1122 سمیت سول ڈیفنس، محکمہ صحت، محکمہ لائیواسٹاک، محکمہ سوشل ویلفیئر نے حصہ لیا،ریسکیو 1122کی جانب سے سیلاب زدہ علاقوں میں پھنسے ہوئے افراد کے ہنگامی انخلاء کا عملی مظاہرہ کیا گیا ڈوبتے ہوئے افراد کو ریسکیو کرنے، ابتدائی طبی امداد فراہم کرنے اور بروقت ایمبولینس کے ذریعے ہسپتال منتقل کرنے کا عملی مظاہرہ بھی کیا گیا، تمام محکموں کی جانب سے فلڈ ریلیف کیمپ لگائے گے تاکہ عوام کو بروقت اور بہتر طور پر ریلیف فراہم کیا جا سکے ۔ ریسکیو 1122 کی جانب سے ایمرجنسی کنٹرول روم بھی قائم کیا گیا تاکہ ممکنہ سیلاب کی صورت میں لوگوں کی بہتر طور پر راہنمائی کی جا سکے ،ڈپٹی کمشنر محمد ریاض نے ریسکیو 1122سمیت تمام اداروں کی کارکردگی پر اطمینان کا اظہار کیا انہوں نے کہا کہ ضلع بھر کے تمام سرکاری ادارے کسی بھی ایمرجنسی صورتحال سے نمٹنے کے لیے بھرپور صلاحیت رکھتے ہیں انکا کہنا تھا کہ سیلاب کی صورتحال سے نمٹنے کے لئے ضلع چنیوٹ کے تمام ادارے ہمہ وقت تیار ہیں ۔ محمد عثمان ریسکیو آفیسر کی جانب سے ممکنہ سیلاب کے پیش نظر مکمل بریفنگ دی گی ۔ فرضی مشقوں میں ضلع بھر کے ریسکیو آفیسرز ریسکیو اہلکاروں اور ریسکیو محافظوں نے حصہ لیا، اس موقع پر ایڈیشنل ڈپٹی کمشنر طارق خان نیازی ، اسسٹنٹ کمشنرز فضل عباس ،عائشہ یٰسین ،خرم شہزاد ، سی او ہیلتھ ڈاکٹر مشتاق بشیر عاکف ،سول ڈیفنس آفیسر محمد صدیق ، ڈپٹی ڈائریکٹر سوشل ویلفیئر مس فرخ رضوان، میڈیا نمائندگان و دیگر بھی موجود تھے ۔
